Rúnar Kárason er kominn með nýja þjálfara hjá Hannover-Burgdorf í þýsku 1. deildinni í handknattleik, en Jens Bürkle var rekinn í síðustu viku.
Í hans stað hefur Hannover ráðið tvo Spánverja, þá Antonio Carlos Ortega og Iker Romero, sem munu í sameiningu stýra liðinu.
Ortega er 45 ára gamall og var síðast þjálfari KIF Kolding í Danmörku og hjá japanska landsliðinu. Hann stýrði einnig ungverska stórliðinu Veszprém árin 2012-2015. Romero er 37 ára gamall og er að fara í sitt fyrsta þjálfarastarf, en hann lagði skóna á hilluna árið 2015 eftir að hafa spilað með Füchse Berlin og Barcelona þar á undan. Hann á 200 landsleiki að baki fyrir Spánverja.
Hannover endaði í 11. sæti þýsku 1. deildarinnar á síðasta tímabili, en liðið vann ekki leik eftir áramót og tapaði meðal annars sextán leikjum í röð. Rúnar fékk sjálfur lítið að spreyta sig þessa mánuði sem illa gekk, eins og hann ræddi um við Morgunblaðið á dögunum.