Verðum að nýta tækifæri okkar

„Við verðum og eigum að nýta okkar tækifæri betur til að ná fram betri úrslitum,“ sagði stórskyttan unga, Birkir Benediktsson, eftir eins marks tap Aftureldingar fyrir Bækkelaget, 26:25, í fyrri viðureign liðanna í fyrstu umferð EHF-keppninnar í handknattleik karla að Varmá í kvöld. Birkir var markahæstur leikmanna Aftureldingar með sjö mörk og kom mjög sterkur upp þegar leið á leikinn.

„Við gerðum líka of mörg tækileg mistök í þessum leik. Norðmennirnir voru fljótir að refsa okkur fyrir hver mistök með hraðaupphlaupum,“ sagði Birkir sem var ánægður með eigin frammistöðu þegar á leikinn leið. „Ég ákvað að koma af krafti á vörn þeirra og sjá hvað myndi gerast.“

Birkir  segir engan mun vera á liðum Aftureldingar og Bækkelaget og þrátt fyrir eins marks tap í kvöld þá sé nóg eftir af þessari rimmu. Aftureldingarliðið á alla möguleika á að snúa taflinu við í síðari leiknum í Ósló eftir viku að mati Birkis.  „Við verðum að eiga góðan leik til þess að vinna ytra en ég tel það vera raunhæft. Það er svo lítill munur á þessum tveimur handboltaliðum,“ sagði Birkir Benediktsson, markahæsti leikmaður Aftureldingar í kvöld.

• Blogga um frétt