Nora Mørk, ein besta handboltakona heims, krefst þess að 15 menn sem brutust í síma hennar í síðasta mánuði og dreifðu viðkvæmum myndum greiði henni 150.000 norskar krónur eða 1,9 milljónir íslenskra króna hver, alls rúmlega 28 milljónir króna.
„Þetta var harkaleg árás á einkalíf mitt þar sem persónulegum og viðkvæmum myndum af mér var stolið úr síma mínum og deilt á veraldarvefnum. Þetta hafði að sjálfsögðu mikil áhrif á mig. Ég var fyrir þetta lífsglöð og hress, en þess í stað á ég erfitt með að horfa framan í daginn þessa stundina. Ég er staðráðin í að reyna að komast aftur í daglega rútínu,“ sagði Mørk um málið í samtali við TV2.
Mørk spilar undir stjórn Þóris Hergeirssonar hjá norska landsliðinu og Györ í Ungverjalandi. Hún verður í eldlínunni í kvöld er Noregur mætir Spáni í 16-liða úrslitum HM.