Hollendingar unnu til bronsverðlauna á heimsmeistaramótinu í handknattleik kvenna eftir sigur á Svíþjóð í miklum baráttuleik í Hamborg í dag þar sem lokatölur urðu 24:21.
Hollendingar réðu lögum og lofum í fyrri hálfleik og voru eftir hann sex mörkum yfir, 14:8.
Þær sænsku komu hins vegar sterkari til leiks í síðari hálfleik og breyttu stöðunni úr 16:9 Hollendingum í vil í 16:16.
Eftir það tók við hörkuspennandi leikur en þegar örfáar mínútur voru eftir var staðan jöfn, 19:19. Holland var hins vegara sterkara á lokasprettinum og vann sigur.