Hollenski varnarmaðurinn Ron Vlaar klúðraði fyrstu spyrnu liðsins í vítaspyrnukeppninni gegn Argentínu í undanúrslitum heimsmeistaramótsins í kvöld. Vlaar átti frábæran leik í vörninni en brást bogalistin á punktinum.
„Ég mundi aldrei víkja undan þeirri ábyrgð sem ég hef. Ég var ekki stressaður fyrir spyrnuna heldur einbeittur. En boltinn verður að fara inn og það gerði hann ekki,“ sagði Vlaar í leikslok.
Hann var þó ekki eini Hollendingurinn sem klúðraði spyrnu því Wesley Sneijder brenndi einnig af sinni, en Sergio Romero í marki Argentínu varði þær báðar.