Karabatic: Hansen verður sá besti

Mikkel Hansen verður sá besti að mati Karabatic sem margir telja þann besta. Reuters

Frakkinn Nikola Karabatic segir í fjölmiðlum að rétthenta stórskyttan í liði Danmerkur hinn 23 ára gamli Mikkel Hansen verði sá besti innan nokkurra ára. Hann segir að Hansen sé meðal þeirra bestu í dag en verði enn betri þegar fram líða stundir. Liðin gætu mæst í úrslitaleiknum um heimsmeistaratitilinn í handbolta en Frakkar mæta Svíum klukkan 17 í dag í fyrri undanúrslitaleiknum. Danir mæta Spáni klukkan 19:30 í seinni undanúrslitaleiknum.

Þessi ummæli Karabatic kættu Hansen að vonum en Karabatic er af mörkum talinn sá allra besti í dag. Hann er ekki bara frábær markaskorari heldur einnig frábær í því að finna réttu færin fyrir meðspilara sína og svo er hann góður varnamaður.

Hansen var í skýjunum þegar danskir fjölmiðlar bári þessi orð undir hann. „Já ég er mjög stoltur, sérsaklega vegna þess að þetta kemur frá Karabatic. Í mínum augum er Karabatic besti leikmaður í heimi. Það er ótrúlegt að sjá hann spila. Hann spilar vel fyrir meðspilarana en er alltaf ógnandi sjálfur.“

Hansen hefur verið frábær í liði Danmerkur á þessu móti en hann hefur skorað 49 mörk og gefið 28 stoðsendingar. „Þetta staðfestir að ég er að gera eitthvað gott á hverjum degi og það er að bera ávöxt. Kannski get ég náð þeim markmiðum að verða sá besti.“ omt@mbl.is