Íþróttir | HM í handbolta | mbl | 24.1.2015 | 17:32 | Uppfært 18:01

Ísland í 16-liða úrslit á HM

Mynd 1 af 13 Arnór Þór Gunnarsson fagnar innilega í leikslok ásamt íslenska landsliðinu. mbl.is/Golli

Mynd 2 af 13 Íslenska landsliðið fagnar í lok leiksins. Golli@mbl.is

Mynd 3 af 13 Guðjón Valur Sigurðsson keyrir á vörnina í leiknum gegn Egyptum í dag. mbl.is/Golli

Mynd 4 af 13 Gunnar Steinn Jónsson kom inn í lið Íslands í fyrsta sinn á þessu móti og brýst hér í gegnum vörn Egypta. mbl.is/Golli

Mynd 5 af 13 Guðjón Valur Sigurðsson í baráttu við Egypsku vörnina í dag. Golli@mbl.is

Mynd 6 af 13 Björgvin Páll Gústavsson freistar þess að verja vítakast gegn Egyptum. mbl.is/Golli

Mynd 7 af 13 Sverre Jakobsson, Guðjón Valur Sigurðsson og Arnór Atlason fagna marki í dag. mbl.is/Golli

Mynd 8 af 13 Alexander Petersson skýtur að marki Egypta í dag. mbl.is/Golli

Mynd 9 af 13 Stuðningsmenn Íslands í stúkunni í Doha. mbl.is/Golli

Mynd 10 af 13 Arnór Atlason hitar upp fyrir leikinn í dag. Golli@mbl.is

Mynd 11 af 13 Íslenska liðið í upphitun í dag. mbl.is/Golli

Mynd 12 af 13 Íslenska liðið var einbeitt í upphitun fyrir leikinn. Golli@mbl.is

Mynd 13 af 13 Sverre Jakobsson og Guðjón Valur Sigurðsson í upphitun. mbl.is/Golli

Ísland er komið í 16-liða úrslit á HM í Katar og mætir þar annaðhvort Dönum eða Pólverjum. Ísland vann Egyptaland 28:25 í lokaumferð C-riðils heimsmeistaramóts karla í handknattleik í Doha í Katar klukkan 16.00. Ísland hafnar í 3. sæti riðilsins á eftir Frökkum og Svíum. Egyptaland er í 4. sæti og Tékkar sitja eftir.

Ísland er með 50% árangur í riðlakeppninni, vann tvo leiki, gerði eitt jafntefli og tapaði tveimur. Töpin voru hins vegar mjög slæm og lita árangurinn töluvert. Nú byrja öll liðin upp á nýtt og útsláttarkeppni tekur við.

Fyrirliðinn Guðjón Valur Sigurðsson fór fyrir liðinu í dag og skoraði 13 mörk í 15 skotum að ég held. Hann sagði eftir tapleikinn gegn Tékkum eitthvað á þá leið að landsliðsmennirnir myndu bara skipta um kennitölu fyrir leikinn gegn Egyptum eins og Íslendingum sæmir og byrja upp á nýtt. Hvort sem Fyrirtækjaskrá ríkisskattsstjóra náði að taka erindið fyrir í tæka tíð eða ekki þá var Guðjón alla vega í miklum ham og spilaði frábærlega. Hans langbesti leikur til þessa í Katar.

Björgvin Páll Gústavsson stóð sig mjög vel í markinu og varði til að mynda 3 vítaköst og munar um minna. Alls varði hann 14 skot. Þá var Ásgeir Örn Hallgrímsson drjúgur og skoraði fimm mörk, þar af fjögur í fyrri hálfleik þegar íslenska liðið vann sig inn í leikinn.

Íslenska liðið byrjaði nefnilega ekki vel í leiknum og var það í fjórða skiptið í fimm leikjum í keppninni sem liðið byrjar illa á upphafsmínútunum. Ísland lenti 1:4 undir en sneri dæminu við og var yfir 15:10 að loknum fyrri hálfleik. Ísland náði mest sex marka forskoti í síðari hálfleik en þá söxuðu Egyptar forskotið niður í aðeins eitt mark en lengra komust þeir ekki.

Gunnar Steinn Jónsson kom inn í leikmannahópinn fyrir Aron Pálmarsson og var ferskur. Gunnar skoraði 3 mörk og var áræðinn gegn 3-2-1-vörn Egypta. Hans fyrsti leikur á HM í Katar.