Markvarslan hefur verið í ágætu lagi hjá íslenska landsliðinu á heimsmeistaramótinu í Frakklandi. Björgvin Páll Gústavsson skilaði góðri frammistöðu í tapleikjunum á móti Spáni og Slóveníu og Aron Rafn Eðvarðsson átti flotta innkomu í seinni hálfleiknum gegn Túnisum. Björgvin Páll er sem stendur vítabani mótsins en hann hefur varið 6 af 11 vítaköstunum sem tekin hafa verið á hann.
Morgunblaðið spjallaði við Björgvin Pál á hóteli landsliðsins í gær. Eftir tvo leiki á tveimur dögum var íslenska liðið í fríi í gær en tók létta æfingu í gærkvöld. Í kvöld mætir Ísland liði Angóla og á fimmtudaginn er síðasti leikur liðsins í riðlinum en þá verður spilað við Makedóníu.
„Það er fínt fyrir egóið að vera sá markvörður sem varið hefur flest vítin en það gleður mig meira að Aron hafi átti frábæran seinni hálfleik á móti Túnis heldur en að ég sé vítabaninn. Ég er frekar að horfa á heildarmyndina. Við erum búnir að fá 25 mörk á okkur að meðaltali sem er óvenjulegt miðað við íslenska landsliðið. Við höfum ekki verið í þessum tölum í mörg ár,“ sagði Björgvin Páll við Morgunblaðið. En Ísland hefur aðeins skorað að meðtali rúm 22 mörk í leik sem er lægsta markaskor íslenska landsliðsins á HM í 27 ár.
Viðtalið við Björgvin Pál má sjá í íþróttablaði Morgunblaðsins í dag.