Frakkar gera sér góðar vonir um að setja áhorfendamet á heimsmeistaramóti í handknattleik þegar þeir leika í sextán liða úrslitunum í Lille á laugardaginn.
Leikið verður á knattspyrnuvellinum Stade Pierre Mauroy þar sem hægt verður að koma fyrir rúmlega 28 þúsund áhorfendum. Áhorfendametið á leik á HM er 25 þúsund áhorfendur sem sáu Svía og Rússa eigast við í úrslitaleik á Cairo Stadium í Egyptalandi árið 1999.
Sá möguleiki er fyrir hendi að Íslendingar verði mótherjar Frakkanna í 16-liða úrslitunum. Frakkar hafa þegar tryggt sér sigur í A-riðlinum og mæta liðinu sem hafnar í 4. sætinu í B-riðli. Í því sæti gætu Íslendingar endað en það skýrist eftir leik Íslands og Makedóníu á morgun.
.@StadePM To be continued pic.twitter.com/H3jbyo2CJ0
— France Handball 2017 (@Hand2017) January 16, 2017