„Mun aldrei gleyma þessum leik“

„Það var æðislegt að fá að taka þátt í þessum leik og honum mun ég aldrei gleyma,“ sagði hinn ungi Janus Daði Smárason við mbl.is eftir tapið gegn Frökkum í 16-liða úrslitunum á HM í handknattleik í Lille í Frakklandi í kvöld.

„Það er ömurlegt að fá ekki fleiri svona leiki. Við sýndum á þessu móti að þótt allir okkar leikmenn séu ekki að spila í Meistaradeildinni þá eigum við fullt erindi í þessi lið. Við þurfum að fá að spila okkur aðeins betur saman. Við vorum fjórir nýir á þessu móti og nú erum við komnir með stórmót í farteskið,“ sagði Janus Daði sem fékk að spreyta sig með landsliðinu á stóra sviðinu í fyrsta sinn á þessu heimsmeistaramóti.

„Ég dreg mikinn lærdóm af þessu móti. Ég get farið á koddann í kvöld og hugsað ef og hefði þetta og ef og hefði hitt. Þetta er vonandi ekki mitt fyrsta og síðasta stórmót. Vonandi er þetta bara byrjunin á einhverju stærra. Það er mikið stolt að spila undir merkjum HSÍ og Íslands og nú er bara næst á dagskrá að komast inn á næsta stórmót sem verður eftir ár,“ sagði Janus Daði.

• Blogga um frétt