Guðmundur Guðmundsson, þjálfari danska karlalandsliðsins í handknattleik, á að segja af sér að mati Jan Jensen, fréttamanns Extrabladet.
Danir féllu úr leik í 16-liða úrslitum heimsmeistaramótsins í Frakklandi eftir 27:25 tap gegn Ungverjum í dag og eins og við var að búast voru danskir fjölmiðlar allt annað en sáttir.
Leikurinn var síðasti leikur Guðmundar með Dönum á stórmóti en hann á eftir að stýra þeim í leikjum í undankeppni EM, áður en hann hættir með liðið og Nicolaj Jacobsen tekur við.
Jensen er ekki sérstaklega ánægður með það og vill hann að Guðmundur segi umsvifalaust af sér, hann á þó ekki von á því enda segir hann Guðmund vera þrjóskan mann. Jensen bætir svo við að Guðmundur hafi ekki náð því besta út úr liðinu, þrátt fyrir að hafa unnið gull á Ólympíuleikunum í Ríó í sumar.
Fyrirsögn Extrabladet um leikinn er einfaldlega „Danskar hamfarir“ og er ljóst að danska þjóðin er slegin eftir tapið óvænta. „Partýið var búið áður en það byrjaði,“ er svo bætt við.