Ísland fer glæsilega af stað á HM karla í handbolta en íslenska liðið vann sterkan 30:26-sigur á því portúgalska í fyrsta leik sínum í D-riðli. Leikið er í Kristianstad í Svíþjóð.
Ísland er því komið með tvö stig, eins og Ungverjaland. Þrjú efstu liðin í riðlinum fara áfram í milliriðil.
Ísland byrjaði betur og var skrefinu á undan framan af. Ísland komst tveimur mörkum yfir í fyrsta sinn í stöðunni 4:2 og náði mest fjögurra marka mun í hálfleiknum, 6:2 og 7:3.
Þá kom góður kafli hjá Portúgal, sem jafnaði í 7:7. Í kjölfarið tók Guðmundur Guðmundsson leikhlé og við það batnaði sóknarleikur íslenska liðsins til muna og var Ísland með 11:9-forskot þegar tíu mínútur voru eftir af fyrri hálfleik.
Portúgal var hins vegar sterkara liðið í lok hálfleiksins og íslenska liðið fór stundum illa með góð færi til að auka muninn. Var því allt hnífjafnt eftir fyrri hálfleik, 15:15.
Íslenska liðinu gekk illa að stöðva Pedro Portela, sem skoraði sjö mörk í fyrri hálfleik. Ómar Ingi Magnússon var með fimm fyrir Ísland og Bjarki Már Elísson þrjú.
Ísland var með betri markvörslu í fyrri hálfleik, því Björgvin Páll Gústavsson varði níu skot í markinu gegn fimm hjá Portúgal. Tapaðir boltar í sókninni reyndust hins vegar dýrkeyptir og því var jafnt þegar hálfleiksflautan gall.
Íslenska liðið var snöggt að ná undirtökunum enn á ný í upphafi seinni hálfleiks og var skrefi á undan framan af í honum. Þegar 18 mínútur voru eftir fékk Fábio Magalhaes í liði Portúgals rautt spjald fyrir mjög ljótt brot á Ómari Inga og Bjarki Már skoraði úr vítinu sem fylgdi og kom Íslandi þremur mörkum yfir, 21:18.
Rétt eins og í fyrri hálfleik neitaði portúgalska liðið að gefast upp og þegar seinni hálfleikur var rétt rúmlega hálfnaður munaði aftur aðeins einu marki, 22:21 og skömmu síðar var allt jafnt, 22:22.
Jafnræðið hélt áfram næstu mínútur og var staðan 24:24, þegar rúmar átta mínútur voru eftir. Þá tók Guðmundur leikhlé og Ísland komst tveimur mörkum yfir í kjölfarið, 26:24, þegar fimm mínútur voru eftir og svo þremur þegar þrjár og hálf voru eftir, 27:24.
Íslendingar reyndust svo of sterkir fyrir Portúgali á lokakaflanum og sigldi sætum sigri í hús, en afar mikil orka fór í leikinn hjá báðum liðum.
Bjarki Már Elísson var markahæstur hjá Íslandi með níu mörk, Ómar Ingi Magnússon skoraði sjö og Elliði Snær Viðarsson fjögur. Björgvin Páll Gústavsson varði 13 skot í markinu. Pedro Portela skoraði átta fyrir Portúgal.
Næsti leikur Íslands er gegn Ungverjalandi á laugardag klukkan 19:30.