Íslands- og deildarmeistarar Esju í íshokkí hafa samið við Aron Knútsson um að leika með liðinu á næsta tímabili.
Aron hefur síðustu tvö tímabil leikið í Kanada með Almaguin Spartans og verið þar í lykilhlutverki. Áður en hann hélt utan spilaði hann hér heima með Birninum.
Aron er 21 árs gamall og var nýliði í íslenska landsliðinu sem fór á heimsmeistaramótið í Galati í Rúmeníu í vor. Þar skoraði hann meðal annars seinna mark Íslands í 2:0-sigri á heimamönnum, sem var jafnframt fyrsti sigur A-landsliðs Íslands á Rúmeníu frá upphafi. yrkill@mbl.is