Snæfell í bikarúrslit eftir öruggan sigur í Keflavík
Jón Ólafur Jónsson var heitur hjá Snæfell í dag og skoraði 23 stig. mbl.is/Brynjar Gauti
Keflavík og Snæfell áttust við í Keflavík í undanúrsiltum Subwaybikarsins í körfuknattleik karla í dag. Snæfell vann öruggan sigur 90:64 og tryggði sér sæti í bikarúrslitaleiknum í Laugardalshöll. Andstæðingar þeirra verða annað hvort ÍR eða Grindavík. Fylgst var með gangi mála hér á mbl.is.
40. mín: LEIK LOKIÐ. Snæfell sigraði 90:64. Frábær frammistaða hjá Snæfell og Keflvíkingar náðu ekki að setja verulega spennu í leikinn í síðari hálfleik.
30. mín: Staðan er 48:63 fyrir Snæfell fyrir síðasta leikhlutann. Gestirnir úr Stykkishólmi eru að spila gríðarlega vel og virðast vera komnir með annan fótinn í Laugardalshöllina. Jón Ólafur Jónsson hefur verið sjóðandi heitur hjá Snæfelli og hefur skorað 20 stig.
20. mín: Staðan er 29:46 fyrir Hólmarar að loknum fyrri hálfleik. Keflvíkingar þurfa að komast í réttan gír í síðari hálfleik ætli þeir sér að komast í úrslitaleikinn. Snæfell er annálað fyrir öflugan varnarleik og það getur orðið þrautinni þyngri hjá Keflavík að vinna upp mikið forskot gegn þeim
Jón Nordal Hafsteinsson leikmaður Keflvíkinga og Pálmi Freyr Sigurgeirsson leikmaður Snæfells sem er ekki leikfær vegna meiðsla. mbl.is/Árni
