Met hjá Helenu og TCU

Helena Sverrisdóttir í leik með TCU. mbl.is/TCU

Helena Sverrisdóttir landsliðskona í körfuknattleik heldur áfram að gera það gott í bandarísku háskóladeildinni. Lið hennar TCU frá Dallas vann stórsigur á Air Force 77:47 um helgina og var það nítjándi sigurleikur TCU í röð á heimavelli. Er það jöfnun á mestu sigurgöngu í sögu skólans.

TCU tapaði síðast á heimavelli í janúar 2009. Helena var stigahæst í liði TCU með 17 stig en setti auk þess persónulegt met í háskóladeildinni með því að stela boltanum 6 sinnum af andstæðingunum. Helena var auk þess með frábæra hittni í leiknum. Hún hitti 7 af 8 skotum sínum innan teigs og 3 af 3 þriggja stiga skotum sínum.

Næsti leikur TCU verður nk miðvikudag en þá mætir liðið Utah háskólanum í Salt Lake City. Leikurinn verður sýndur um öll Bandaríkin í beinni útsendingu hjá CBS College Sports sjónvarpsstöðinni. Hróður Helenu hefur borist víða í háskólaboltanum í Bandaríkjunum og mun varla minnka eftir sjónvarpsleikinn í Utah. kris@mbl.is