„Þetta er fáránlega góð tilfinning“

Leikmenn og forráðamenn Snæfells fagna sigri. Golli / Kjartan Þorbjörnsson

Ingi Þór Steinþórsson þjálfari Snæfells fagnaði sigri í bikarkeppni KKÍ í fyrsta skipti í dag þegar lærisveinar hans lögðu Grindvíking að velli 92:81 í Laugardalshöll.

„Þetta er fáránlega góð tilfinning. Það væri náttúrlega bara hroki ef maður væri ekki ánægður með þetta. Við vorum að leggja frábært lið að velli og unnum ennþá sterkara lið í undanúrslitum þannig að við erum virkilega búnir að vinna fyrir þessu,“ sagði Ingi í samtali við mbl.is þegar sigurinn var í höfn. Ingi er á sínu fyrsta ári í Stykkishólmi og gæti því vart byrjað betur hjá Snæfelli en að vinna bikarinn á sínu fyrsta tímabili með liðið. „Hólmarar eru gríðarlega stoltir af öllu starfinu. Stjórnin er frábær og allir sem eru í kringum starfið. Þetta hefur því verið mjög gaman og þessi sigur gerir starfið bara ennþá betra,“ sagði Ingi ennfremur.

Mbl.is lék forvitni á að vita hvernig Snæfell hefði farið að því að halda aftur af landsliðsmanninum Páli Axel Vilbergssyni sem aðeins skoraði 4 stig í leiknum. „Við höfðum tvo leikmenn til þess að skiptast á að valda hann. Siggi Þorvalds og Berkis stóðu sig báðir mjög vel í því. Páll Axel er frábær leikmaður og við náðum að loka nokkuð vel á hann. Heilt yfir þá var liðsvörnin til staðar. Við misstum aðeins af Gulla Eyjólfs í þriggja stiga skotunum þegar menn voru að hjálpa of mikið að valda aðra leikmenn en liðsvörnin var annars mjög góð.“

Fjallað verður um leikinn í átta síðna íþróttablaði Morgunblaðsins á mánudaginn. 

Leikmenn Snæfells fagna bikarmeistaratitlinum í leikslok. Golli / Kjartan Þorbjörnsson