Grindvíkingar sóttu 2 stig í Garðabæinn

Jovan Zdravevski leikmaður Stjörnunnar. mbl.is/Kristinn

Stjarnan og Grindavík áttust við í Iceland Express deild karla í körfuknattleik í Garðabæ klukkan 19:15. Grindavík sigraði 81:76 í jöfnum leik en Stjarnan var yfir í hálfleik 36:32.

Fylgst var með gangi mála hér á mbl.is.

Stigahæstir:

Stjarnan: Jovan Zdravevski 22, Justin Shouse 21.

Grindavík: Páll Axel Vilbergsson 24, Darrel Flake 18.

40. mín: LEIK LOKIÐ. Grindvíkingar lönduðu sigri. Páll Axel innsiglaði sigurinn á vítalínunni. Jovan Zdravevski fékk tækifæri til þess að jafna leikinn í stöðunni 76:79 en hitti ekki úr þriggja stiga skoti.

40. mín: Staðan er 76:72 fyrir Grindavík. 35 sekúndur eftir og Stjarnan er með boltann. Teitur Örlygsson þjálfari Stjörnunnar tekur leikhlé.

35. mín: Staðan er 68:68. Síðustu fimm mínúturnar ættu að verða spennandi.  Darrel Flake og Ómar Örn Sævarsson eru báðir með fjórar villur hjá Grindavík og Magnús Helgason hjá Stjörnunni.

30. mín: Staðan er 59:56 fyrir Stjörnuna fyrir síðasta leikhlutann.  Jovan Zdravevski er stigahæstur hjá Stjörnunni með 18 stig og Djordje Pantelic hefur tekið 9 fráköst. Hjá Grindavík er Darrel Flake með 16 stig, 6 fráköst og 5 stoðsendingar. 

25. mín: Staðan er 48:45 fyrir Stjörnuna. Leikurinn er algerlega í járnum þessa stundina. Grindvíkingar hafa ekki verið heitir fyrir utan og eru farnir að leita meira að Darrel Flake undir körfunni.

20. mín: Staðan er 36:32 fyrir Stjörnuna að loknum fyrri hálfleik. Frumkvæðið hefur verið Garðbæinga í öðrum leikhluta en Grindvíkingar hafa ekki hleypt þeim langt frá sér. Hittnin er ekki góð eins og tölurnar bera með sér og ef annað liðið fer í stuð og fær skotin niður þá ætti eftirleikurinn að vera auðveldur. 

15. mín: Staðan er 28:21 fyrir Stjörnuna. Garðbæingar hafa slitið sig frá Grindvíkingum með góðum kafla í upphafi annars leikhluta. Friðrik Ragnarsson þjálfari Grindavíkur tekur leikhlé. 

10. mín: Staðan er 15:16 fyrir Grindavík.  Hittni leikmanna hefur verið slök í fyrsta leikhlutanum og eins og eitthvað slen sé yfir mönnum. Úr rætist vonandi í öðrum leikhluta því hér eru tvö skemmtileg lið að mætast.

5. mín: Staðan er 8:6 fyrir Stjörnuna. Leikurinn fer rólega af stað og liðin spila hægt til þess að byrja með.