Haukur Pálsson samdi við Maryland

Körfuknattleiksmaðurinn ungi og efnilegi, Haukur Pálsson. mbl.is

Haukur Pálsson landsliðsmaður í körfuknattleik hefur gert munnlegt samkomulag við Maryland sem er eitt sterkasta háskólalið Bandaríkjanna. Haukur fetar þar með í fótspor þekktra NBA leikmanna eins og Steve Francis, Buck Williams og Joe Smith.

Maryland er 22. sæti á listanum yfir sterkustu háskólalið landsins og varð háskólameistari árið 2002.  Maryland leikur í ACC riðlinum sem er gífurlega sterkur og þar leika lið á borð við North Carolina og Georgia Tech.

Haukur er uppalinn Fjölnismaður en hefur leikið körfuknattleik á Flórída í vetu en hefur gert munnlegt samkomulag við Maryland um að hefja nám við skólann á körfuboltastyrk.

Frá þessu er greint á vef Körfuknattleikssambandsins, kki.is.