Helena leikmaður ársins í Mountain West deildinni
Helena Sverrisdóttir og Jeff Mittie þjálfari TCU. mbl.is/TCU
Íslenska landsliðskonan í körfubolta, Helena Sverrisdóttir,
var í gær valin leikmaður ársins í Mountain West deildinni í bandaríska
háskólakörfuboltanum. Helena er aðeins þriðji leikmaðurinn í sögu TCU háskólaliðsins
sem fær þessa viðurkenningu en lið hennar TCU sigraði í Mountain West
deildinni.
Jeff Mittie þjálfari TCU er þjálfari ársins í MW-deildinni en Helena var að
sjálfsögðu valin í fimm manna úrvalslið deildarinnar ásamt liðsfélaga sínum Emely Carter. Þetta er annað
árið í röð þar sem Helena er valin í fimm manna úrvalslið deildarinnar.
Helena skoraði 13,6 stig að meðaltali í vetur, tók 6,6 fráköst, gaf 5,3 stoðsendingar og stal boltanum 2,3 að meðaltali í hverjum leik. Hún var á meðal 15 efstu í MW-deildinni í fjórum tölfræðiþáttum, hún var önnur á lista yfir flestar stoðsendingar, þriðja í fráköstum og níunda í stigaskorun.
TCU leikur á föstudaginn fyrsta leikinn í úrslitakeppninni í Las Vegas. Ekki er enn ljóst hvaða lið verður mótherji TCU sem komst beint í undanúrslit keppninnar með því að sigra í MW-deildinni.
