Er enn í hálfgerðu sjokki

Ingvaldur Magni Hafsteinsson og Tómas Tómasson hjá Fjölni í vörn gegn Steinari Arasyni hjá ÍR í leiknum í kvöld. mbl.is/Ómar

"Þetta var gríðarlega svekkjandi eftir að hafa verið nánast með unninn leik, og ég er enn þá í hálfgerðu sjokki," sagði Ingvaldur Magni Hafsteinsson, körfuboltamaðurinn reyndi úr Fjölni, eftir að lið hans tapaði á ótrúlegan hátt fyrir ÍR, 89:90, í úrvalsdeildinni í kvöld.

Robert Jarvis skoraði ævintýralega sigurkörfu fyrir ÍR-inga, langt utan af velli, rétt áður en leiktíminn rann út og sigur sem virtist í höfn hjá Fjölnismönnum rann þeim úr greipum.

Þetta getur farið á alla vegu hjá okkur úr þessu, ef við vinnum báða leikina sem eftir eru eigum við möguleika á sæti í úrslitakeppninni. Þetta er enn þá undir okkur komið og það er a.m.k. jákvætt", sagði Magni við mbl.is eftir leikinn.

Fjölnir er með 12 stig í 10. sæti deildarinnar, tveimur stigum meira en Breiðablik sem er í fallsæti, en liðin mætast einmitt í næstsíðustu umferðinni á sunnudagskvöldið. Tapi Fjölnismenn leiknum eru þeir í mikilli fallhættu, en vinni þeir, geta þeir enn komist í úrslitakeppni átta efstu liðanna.

Sjá nánari umfjöllun um leikinn í íþróttablaði Morgunblaðsins í fyrramálið.