Ótrúlegur endasprettur tryggði KR sigur í Garðabæ
Justin Shouse leikstjórnandi Stjörnunnar. mbl.is/Ómar
Stjarnan og KR áttust við í Iceland Express deildinni í körfuknattleik karla í Ásgarði í Garðabæ og hófst leikurinn klukkan 19:15. KR sigraði 88:87 í leik þar sem Stjarnan hafði um tíma 24 stiga forskot. Fylgst var með gangi mála hér á mbl.is.
Stigahæstir:
Stjarnan: Jovan Zdravevski 22, Justin Shouse 18.
KR: Brynjar Björnsson 32, Fannar Ólafsson 18.
40. mín: LEIK LOKIÐ. KR sigraði 88:87 eftir ótrúlegan endasprett. Fannar Ólafsson skoraði síðasta stigið af vítalínunni þegar 7 sekúndur voru eftir. Á síðustu 2-3 mínútum misstu Garðbæingar boltann ítrekað og KR-ingar refsuðu með þriggja stiga körfum. Morgan Lewis var drjúgur í síðasta leikhlutanum og Brynjar Björnsson skoraði glæsilega þriggja stiga körfu og jafnaði leikinn 87:87 þegar hálf mínúta var eftir.
39. mín: Staðan er 87:84 fyrir Stjörnuna. Ótrúlegur kafli KR-inga. Teitur Örlygsson þjálfari Stjörnunnar tekur leikhlé. Stjarnan er með boltann og 1,15 mínútur eftir af leiknum. Skyndilega er hörkuspenna í leiknum.
37. mín: Staðan er 84:74 fyrir Stjörnuna. KR-ingum hefur tekist að minnka muninn niður í 10 stig. Morgan Lewis hefur skorað 5 stig í röð fyrir KR.
34. mín: Staðan er 80:65 fyrir Stjörnuna. KR-ingum hefur tekist að ná muninum niður í 15 stig en þeir þurfa að hafa hraðar hendur ætli þeir sér að ná einhverju út úr leiknum. Brynjar Björnsson er þeirra heitastur og hefur skorað 22 stig.
30. mín: Staðan er 76:56 fyrir Stjörnuna þegar einungis einn leikhluti er eftir. Ólafur J. Sigurðsson skoraði ævintýralega flautukörfu um leið og leiktíminn rann út í þriðja leikhluta. Stjarnan náði mest 23 stiga mun en KR-ingar náðu því niður í sautján stig áður en Ólafur svaraði. Fátt bendir til annars en að Íslandsmeistararnir tapi hér í Garðabænum eins og svo mörg önnur lið hafa gert í vetur.
25. mín: Staðan er 58:40 fyrir Stjörnuna. KR-ingar eru ekki mikið að saxa á forskotið en þeir hafa verið duglegir að taka sóknarfráköst og þau halda þeim eiginlega inni í leiknum.
20. mín: Staðan er 49:30 fyrir Stjörnuna að loknum fyrri hálfleik. Hittni Garðbæinga hefur verið frábær í fyrri hálfleik og KR-ingar hafa ekki átt nein svör við sóknarleik þeirra. Kjartan Kjartansson setti tvær þriggja stiga körfur í öðrum leikhluta. Jovan Zdravevski er stigahæstur með 14 stig og skoraði þriggja stiga körfu á lokasekúndu fyrri hálfleiks. Í kjölfarið lenti honum og Tommy Johnson saman svo lá við slagsmálum. Samherjum þeirra tókst að ganga á milli og skakka leikinn.
14. mín: Staðan er 31:17 fyrir Stjörnuna. 14 stiga munur eftir aðeins 14 mínútna leik og Stjarnan er að sýna allar sínar bestu hliðar. Páll Kolbeinsson þjálfari KR tekur leikhlé.
10. mín: Staðan er 22:16 fyrir Stjörnuna að loknum fyrsta leikhluta. Það er mikill kraftur í Garðbæingum og þeir náðu mest sjö stiga forskoti 17:10.
