Helena og samherjar úr leik

Helena Sverrisdóttir náði sér ekki á strik í kvöld. mbl.is/TCU

Helena Sverrisdóttir og samherjar hennar í háskólaliði TCU féllu í kvöld út í undanúrslitum Mountain West háskóladeildarinnar í bandaríska körfuboltanum. Þær eiga þó möguleika á að komast bakdyraleið inní sjálfa úrslitakeppnina.

TCU mætti liði Utah, sem það hafði sigrað í báðum viðureign liðanna í deildakeppni vetrarins. Í kvöld var lið TCU hinsvegar heillum horfið og lenti á tímabili 23 stigum undir en lokatölur urðu 69:57 fyrir Utah.

Helena skoraði 12 stig í leiknum og náði sér ekki á strik í skotunum en hún hitti aðeins úr þremur af 14 tilraunum sínum utan af velli. Helena var fyrr í vikunni útnefnd leikmaður ársins í deildinni.

Þar með missti TCU af því að leika til úrslita um meistaratitil Mountain West deildarinnar á morgun, og því að vinna sér sæti í úrslitakeppni 64 bestu háskólaliða Bandaríkjanna. TCU er þó talið vera með 25. besta lið landsins og fær annað tækifæri á mánudaginn þegar tilkynnt verður hvaða lið sem ekki unnu sér beinan þátttökurétt fá að fara í úrslitakeppnina.