Karl: Ánægður með fjóra sigra í röð

Karl Jónsson mbl.is

„Við ákváðum að fara í úrslitakeppnina á eigin forsendum og sigruðum í síðustu fjórum leikjum og ég er mjög ánægður með það,“ sagði Karl Jónsson, þjálfari Tindastóls, eftir sigurinn á Fjölni í kvöld.

„Sóknarleikurinn var full hægur í kvöld. Fjölnir er með öskufljóta kantmenn og við lentum í vandræðum með þá í kvöld. En við sýndum mikinn styrk eins og í undanförnum leikjum. Við höfum lent undir en náð að rífa okkur upp og sigra. Það er rosalega flott og fjórir sigrar í röð er gott veganesti í úrslitakeppnina.

Það varð að gera eitthvað og þess vegna breyttum við vörninni. Þegar hún smellur þá hefur það áhrif á sóknina, það kemur meira flæði og auðveldari körfur.

Ég held það hafi verið dálítið spenna í báðum liðum í kvöld og leikurinn einkenndist því kannski af taugaveiklun, enda talsvert mikið í húfi. Menn voru ragir við að taka áhættuna, en á einhverjum tímapunkti þarf að taka af skarið og við gerðum það á réttum tíma í kvöld.

Við mætum Keflavík í úrslitakeppninni. Þar er frábært lið á ferðinni en það sem er gleðilegt fyrir okkur er að við vinnum síðustu fjóra leikina þannig að það gefur okkur eitthvað. Þetta verða því í það minnsta þrír leikir,“ sagði Karl kampakátur með lokasprettinn hjá sínum mönnum í vetur.