Spenna fyrir lokaumferðina í úrvalsdeild karla
Pavel Ermolinskij leikmaður KR. mbl.is
Lokaumferð Iceland Express deildar karla í körfubolta fer fram í kvöld en þá
fara fram sex leikir. KR og Grindavík eiga bæði möguleika á að tryggja sér
efsta sætið og þar með deildarmeistaratitilinn. Fjögur lið berjast um tvö laus sæti í átta liða úrslitum. Breiðablik og FSu er fallin í 1. deild.
Snæfell og KR eigast við í
Stykkishólmi og með sigri tryggir KR sér deildarmeistaratitilinn. Ef KR tapar
hinsvegar og Grindavík leggur ÍR að velli í Seljaskóla þá verða Grindvíkingar
deildameistarar.
Keflavík tekur á móti Hamri á heimavelli. Keflvíkingar geta tryggt sér annað
sætið í deildinni með sigri en þeir verða fyrir ofan Grindavík ef liðin eru
jöfn að stigum.
Baráttan um fjórða sætið verður hörð en þrjú lið eru jöfn að stigum, Snæfell,
Stjarnan og Njarðvík. Ef liðin vinna
leiki sína í kvöld verður röðin þessi, Snæfell í fjórða, Stjarnan í fimmta og
Njarðvík í sjötta sæti.
Tindastóll, ÍR, Hamar og Fjölnir eru í baráttu um tvö laus sæti í átta liða
úrslitum. Staðan er nokkuð flókin en Tindastóll stendur best að vígi með 16
stig í sjöunda sæti. ÍR, Hamar og Fjölnir eru öll með 14 stig. Fjölnir og
Tindastóll eigast við í kvöld og sá leikur skiptir miklu máli um hvernig
lokastaðan verður í deildinni.
