Orlando og Denver á sigurbraut

Carmelo Anthony setti persónulegt met í nótt og tók 18 fráköst í liði Denver. Reuters

Aðeins tveir leikir fóru fram í NBA deildinni í körfuknattleik í nótt. Denver hafði betur gegn New Orleans 93:80 á heimavelli. Orlando hafði betur gegn Miami í framlengdum leik á útivelli í grannaslagnum á Flórídaskaganum 108:102.

Carmelo Anthony skoraði 26 stig fyrir Denver og tók 18 fráköst sem er persónulegt met. Þetta er áttundi sigur Denver í síðustu níu leikjum en liðið er með næst besta árangurinn í Vesturdeildinni á eftir meistaraliði LA Lakers.

Vince Carter skoraði 27 stig fyrir Orlando, Rashad Lewis skoraði 24 í 108:102 sigri. Orlando hefur unnið 10 af síðustu 11 leikjum sínum. Að venju var Dwyane Wade allt í öllu í liði Miami en hann skoraði 36 stig og tók 10 fráköst.