Helena:„ Ég er rosalega stolt af mínu liði“
Helena Sverrisdóttir. mbl.is/TCU
Ég er rosalega stolt af mínu liði þrátt fyrir tapið. Við börðumst af krafti og vorum mjög nálægt því að komast áfram í 32 liða úrslitin. Það gekk því miður ekki eftir,“ sagði Helena Sverrisdóttir í samtali við mbl.is í kvöld en lið hennar TCU tapaði naumlega 67:66 gegn Dayton í 64 liða úrslitum NCAA deildarinnar í háskólakörfuboltanum í kvöld.
„Það var
gríðarlega gaman að upplifa þessa stemningu sem fylgir því að taka þátt í „Marsfárinu",
(March madness). Það er mikill áhugi á þessari keppni og stemningin á leiknum
var engu lík," bætti Helena við en hún var stigahæst í liði TCu með 17 stig og setti persónulegt met með því að taka 13 fráköst. Að auki gaf Helena 6 stoðsendingar.
„Fyrir leikinn þá töluðum við um að til að vinna þyrftum að berjast og leggja meira á okkur en andstæðingarnir. Að mínu mati tókst okkur það, við spiluðum af krafti allan tíman. Við náðum 18 stiga forskoti þegar 13 mínútur voru eftir . Dayton liðið hitti úr nokkrum þriggja stiga skotum sem kom þeim inn í leikinn. Þær léku góða svæðisvörn þar sem áherslan var lögð á að stöðva einstaka leikmenn. Skotvalið á lokakaflanum var lélegt hjá okkur og sóknarleikurinn fór úr skorðum. Dayton komst yfir í fyrsta skipti í leiknum þegar 25 sekúndur voru eftir. Við náðum að svara því en þær komust yfir á ný þegar 17 sekúndur voru eftir. Sigurkörfuna skoruðu þær 1 sekúndu fyrir leikslok eftir mikla baráttu undir körfunni. Það var ótrúlega sárt að tapa með þessum hætti," sagði Helena Sverrisdóttir.
