Stórleikur Helenu dugði ekki til

Helena Sverrisdóttir. mbl.is/TCU

Helena Sverrisdóttir og félagar hennar í TCU háskólaliðinu í körfubolta féllu úr leik í 64-liða úrslitum NCAA keppninnar í kvöld. TCU lék gegn Dayton og úrslitin réðust á lokasekúndunni þar sem að Brittany Wilson leikmaður Dayton skoraði úr sniðskoti og tryggði liðinu 67:66 sigur. Helena var atkvæðamest í liði TCU og skoraði hún 17 stig, tók 13 fráköst og gaf 6 stoðsendingar.

TCU var með 18 stiga forskot þegar 13 mínútur voru eftir af leiknum.  Helena hitti úr 9 af 10 vítaskotum sínum í leiknum. Þriggja stiga skotin gengu ekki upp hjá íslensku landsliðskonunni en ekkert af 6 skotum hennar fór rétta leið. Fjögur af alls sextán tveggja stiga skotum hennar fóru ofaní.