Ótrúlegur sigur Boston á Orlando
Hinn gamalreyndi bakvörður Steve Nash hjá Phoenix með boltann í leik liðsins við Dallas í nótt. Reuters
Vængbrotið lið Boston Celtics vann ótrúlega stóran sigur á Orlando Magic í nótt, 87:56, í NBA-deildinni í körfubolta en lið Orlando hefur aldrei fyrr í NBA-sögu sinni skorað jafn fá stig í leik í deildinni.
Hjá Boston vantaði fimm leikmenn, þar á meðal Rajon Rondo og Ray Allen, en magnaður varnarleikur, þar sem liðið fékk aðeins 20 stig á sig allan seinni hálfleikinn, lagði grunninn að sigrinum. Paul Pierce skoraði 19 stig fyrir Boston og Dwight Howard 18 fyrir Orlando.
„Þeir léku okkur grátt og þó við eigum skilið að fá skömm í hattinn má ekki gleyma að hrósa leikmönnum Boston. Varnarleikur þeirra var hreinlega stórkostlegur," sagði Stan Van Gundy, þjálfari Orlando eftir leikinn.
Meistarar Dallas Mavericks halda áfram að laga stöðu sína og lögðu Phoenix Suns, 93:87. Shawn Marion skoraði 29 stig fyrir Dallas, en liðið lék án þýska risans Dirks Nowitzki sem er meiddur á hné. Dallas hefur nú haldið mótherjum sínum undir 100 stigum í 15 leikjum í röð sem er félagsmet.
Úrslitin í nótt:
Philadelphia - Washington 103:83
Boston - Orlando 87:56
Chicago - New Jersey 110:95
Milwaukee - Atlanta 92:97
New Orleans - San Antonio 102:104
Oklahoma City - Detroit 99:79
Minnesota - Houston 92:107
Dallas - Phoenix 93:87
Portland - Sacramento 101:89
Golden State - Memphis 90:91
