Fyrsta tap Chicago á heimavelli
Dahntay Jones hjá Indiana sækir að körfu Chicago þar sem Carlos Boozer og Joakim Noah eru til varnar. Reuters
Chicago Bulls tapaði í nótt sínum fyrsta heimaleik á þessu keppnistímabili í NBA-deildinni í körfuknattleik þegar Indiana Pacers kom í heimsókn. Lokatölur í United Center voru 90:95.
Danny Granger skoraði 22 stig fyrir Indiana og Roy Hibbert 20 en Derrick Rose gerði 24 stig fyrir Chicago, sem saknaði Luol Dengs en hann missti af leiknum vegna meiðsla.
LA Lakers lagði LA Clippers í borgarslag í Los Angeles, 96:91, og jafnaði þar metin í leikjum liðanna í vetur í 1:1. Þetta var tólfti leikurinn í röð þar sem Lakers nær ekki 100 stigum en það kom ekki að sök í þetta sinn. Kobe Bryant skoraði 24 stig fyrir Lakers og Blake Griffin 26 stig fyrir Clippers.
LeBron James skoraði 32 stig fyrir Miami Heat sem vann Detroit Pistons naumlega á útivelli, 101:98. Þar af skoraði hann sex stig úr vítaskotum á síðustu 80 sekúndum leiksins.
Úrslitin í nótt:
Philadelphia - New Jersey 90:97 (Eftir framlengingu)
Washington - Charlotte 92:75
Cleveland - New York 91:81
Detroit - Miami 98:101
Chicago - Indiana 90:95
Houston - Milwaukee 99:105
Oklahoma City - New Orleans 101:91
Dallas - Minnesota 90:105
San Antonio - Atlanta 105:83
Utah - Toronto 106:111 (Eftir tvær framlengingar)
Sacramento - Denver 93:122
LA Lakers - LA Clippers 96:91
Golden State - Portland 101:93
