Léku ringlaða og ráðalausa Skagfirðinga grátt

Daði Berg Grétarsson úr Fjölni stöðvar Maurice Miller úr Tindastóli í leiknum í gærkvöld. mbl.is/Árni Sæberg

Kristinn Friðriksson sport@mbl.is

Í hráslaga gærkveldsins sóttu Tindastólsmenn Fjölni heim. Mikilvægi leiksins var ótvírætt; Fjölnismenn, sem höfðu ekki sýnt sömu töfra á nýju ári og því síðasta, áttu á hættu að heltast úr lestinni. Tindastólsmenn, með nýjan leikmann innanborðs, Igor Tratnik, hafa hinsvegar verið á hvínandi siglingu og kannski litið á Fjölnisliðið sem auðvelda bráð. Það var Fjölnisliðið hinsvegar ekki og vann sérlega sannfærandi sigur á steingeldum gestunum, 106:87.

Eftir 2:30 mínútur var staðan orðin 13:0 fyrir heimamenn og leikhlé tekið. Þessi stutta samverustund Tindastólsmanna hafði hinsvegar engin áhrif á gang leiksins; heimamenn héldu uppteknum hætti á meðan ringlaðir Skagfirðingar hringsnerust um völlinn ráðalausir, án þess að vita í þennan heim né annan. Sóknarleikur einkenndist af slæmu skotvali, hiki leikmanna og einföldu getuleysi. Ég vil ekki taka neitt af Fjölnismönnum, en þeirra varnarleikur hefur oft verið betri. Málið var samt sem áður að þeir þurftu ekki að spila frábæra vörn gegn því sóknarframtaki sem Tindastóll reiddi fram í gærkvöldi.

Sjá nánar grein Kristins um leikinn í íþróttablaði Morgunblaðsins í dag.