Pétur: Ætluðum að vinna en grófum holu
Craig Schoen leikstjórnandi KFÍ. mbl.is/Ernir Eyjólfsson
„Við ætluðum að vinna,“ sagði Pétur Sigurðsson þjálfari fyrstudeildarliðs KFÍ mjög svo ákveðið eftir að hafa tapað 90:77 fyrir Keflavík í undanúrslitum bikarkeppni karla í Keflavík í kvöld.
„Við komum í þennan leik til að vinna, eins og við gerum í hverjum einasta leik, enda sáum við mikla möguleika á sigri en við grófum okkur holu í öðrum leikhluta og það er erfitt að koma til baka gegn góðu liði eins og Keflavík. Við gerðum þetta aftur að leik í fjórða leikhluta en það var ekki nóg og því fór sem fór.
Við settum okkur ekki bara markmið fyrir þennan vetur, heldur til nokkurra ára og stefnum á að vinna sæti í úrvalsdeildinni. Ég er ekki með reynda menn, nokkra unga og efnilega stráka í bland við öfluga erlenda leikmenn, svo að við duttum jafnvel aðeins niður í byrjun út af stressi en það er svo sem engin afsökun því Keflavík spilaði betur en við í öðrum leikhluta.“
