Billups ekki meira með í vetur

Chauncey Billups í leik með Denver Nuggets. Reuters

Bandaríska körfuknattleiksliðið Los Angeles Clippers varð fyrir því áfalli að bakvörðurinn öflugi Chauncey Billups leikur ekki meira með því á þessu keppnistímabili.

Billups slasaðist í leik Clippers og Orlando Magic í fyrrinótt og nú hefur verið staðfest að hann er með slitna hásin á vinstri fæti.

Billups, sem er 35 ára gamall, kom til liðs við Clippers í desember og hefur átt drjúgan þátt í góðri byrjun liðsins sem hefur unnið 15 af fyrstu 22 leikjum sínum á tímabilinu. Hann hefur fimm sinnum verið valinn í úrvalslið fyrir Stjörnuleik NBA.

Þar með er ljóst að Billups spilar ekki á Ólympíuleikunum í sumar en hann er í 20 manna landsliðshópi Bandaríkjanna sem hefur verið valinn fyrir leikana.