Kobe Bryant fór upp fyrir Shaq

Kobe Bryant. Reuters

Stórstjarnan Kobe Bryant er kominn í fimmta sæti yfir stigahæstu leikmenn NBA-deildarinnar frá upphafi. Bryant fór upp fyrir sinn gamla samherja Shaquille O'Neal á listanum þegar hann skoraði 28 stig fyrir LA Lakers í tapleik á móti Philadelphia 76ers í fyrrinótt. Bryant vantaði 23 stig til að komast upp fyrir Shaq og náði því strax í fyrri hálfleik. Bryant hefur líklega ekki leiðst það sérstaklega þar sem grunnt var á því góða á milli þeirra á köflum hjá Lakers.

Kobe Bryant hefur skorað 26.601 stig fyrir Lakers en hann er á sínu fimmtánda tímabili í deildinni og gæti bætt duglega í safnið en hann er á þrítugasta og fjórða aldursári. Næstur fyrir ofan Bryant er annar fyrrum leikmaður Lakers, Wilt Chamberlain sem skoraði 31.419 stig á ferlinum.

Gamli höfðinginn Kaarem Abdul-Jabbar er efstur á þessum lista og 38.387 stig. Enn einn fyrrverandi leikmaður Lakers, Karl Malone, hjó nokkuð nærri Jabbar og skilaði 36.928 stigum í hús. Þriðji á listanum er goðsögnin Michael Jordan sem skoraði 32.292 stig. Af öðrum leikmönnum sem enn eru að spiila í NBA-deildinni þá þarf að fara niður í 19. sæti listans en þar er að finna Kevin Garnett hjá Boston Celtics. Hann er á sínu sextánda tímabili og er kominn með 23.637 stig. kris@mbl.is