Topplið Keflavíkur sigraði KR

Jaleesa Butler skoraði 21 stig fyrir Keflavík á móti KR og tók 22 fráköst. mbl.is/Árni Sæberg

Keflavík jók forystu sína á toppi Iceland Express-deildar kvenna í körfuknattleik í kvöld með sigri á KR 70:56. Njarðvík sem er í 2. sæti tapaði fyrr í kvöld fyrir Val á útivelli 100:81.

Jaleesa Butler skoraði 21 stig fyrir Keflavík og tók 22 fráköst. Pálína Gunnlaugsdóttir skoraði 18 stig fyrir Keflavík. Margrét Kara Sturludóttir fór fyrir KR-liðinu en hún skoraði 18 stig og tók 15 fráköst. 

Haukar unnu Hamar í hörkuleik á Ásvöllum  72:66. Hope Elam var stigahæst hjá Haukum með 17 stig. Hún tók 9 fráköst og gaf 5 stoðsendingar. Katherine Graham gerði 22 stig fyrir Hamar en tók auk þess 10 fráköst og gaf 11 stoðsendingar.

Snæfell sigraði Fjölni 90:88 eftir framlengingu og dramatík. Katina Mandylaris fékk tækifæri til að jafna metin fyrir Fjölni og knýja fram aðra framlengingu en hún fékk tvö vítaskot þegar leiktíminn í framlengingunni var liðin.  Henni brást hins vegar bogalistin. Brittney Jones skoraði 38 stig fyrir Fjölni en Kieraah Marlow skoraði 32 stig fyrir Snæfell.