Lin heldur uppteknum hætti

Jeremy Lin sækir að vörn Minnesota í leiknum í nótt. Reuters

Ekkert lát er á velgengni Jeremy Lin með New York Knicks í NBA-deildinni í körfuknattleik. Í nótt vann liðið sinn fimmta sigur í röð í deildinni og enn og aftur var Lin í stóru hlutverki í sigrinum. Knicks vann þá Minnesota á útivelli, 100:98.

Hann skoraði 20 stig og átti átta stoðsendingar og var stigahæstur hjá Knicks ásamt Iman Shumpert. Lin kom Knicks yfir, 99:98, þegar 4,9 sekúndur voru eftir þegar hann nýtti annað af tveimur vítaskotum sínum. Heimamenn áttu möguleika á að komast yfir á ný en brást bogalistin og Russel Walker innsiglaði sigurinn, 100:98, með stigi úr vítaskoti rétt áður en leiktíminn var úti.

Kevin Love skoraði 32 stig og tók 21 frákast fyrir Minnesota og Nikola Pekovic var með 21 stig.

Átta leikir fóru fram í NBA-deildinni í nótt. Úrslit þeirra voru sem að neðan greinir:

Charlotte - LA Clippers 86:111
Cleveland - Philadelphia 84:99
Minnesota - New York 98:100
Milwaukee - Orlando 94:99
Indiana - Denver 109:113
New Jersey - San Antonio 89:103
Dallas - Portland 97:94
Sacramento - Phoenix 84:98