Keflavík og Tindastóll sigruðu
Charlie Parker og félagar í Keflavík unnu KR. mbl.is/Golli
Grindavík vann Val auðveldlega, Keflavík vann KR nokkuð örugglega og Tindastóll lagði ÍR í spennuleik í Seljaskóla þegar sextándu umferð úrvalsdeildar karla í körfubolta, Iceland Express-deildarinnar, lauk í kvöld.
Keflavík sigraði KR, 95:83, í Toyotahöllinni í Reykjanesbæ en þar var KR yfir í hálfleik, 37:31. Jarryd Cole átti stórleik með Keflavík, skoraði 35 stig og tók 16 fráköst, Magnús Gunnarsson skoraði 19 stig og Charlie Parker 15. Hjá KR var Dejan Sencanski með 25 stig og Robert Ferguson 24.
Tindastóll lagði ÍR, 96:92, í hörkuleik í Seljaskóla þar sem liðin voru yfir til skiptis. ÍR var komið í vænlega stöðu undir lokin en Sauðkrækingar áttu góðan endasprett þar sem Maurice Miller tryggði sigurinn af vítalínunni. Miller skoraði 22 stig fyrir Tindastól, Curtis Allen 18 og Igor Tratnik 17. Hjá ÍR var Nemanja Sovic með 24 stig og þeir Robert Jarvis og Hjalti Friðriksson með 19 stig hvor.
Grindavík vann auðveldan sigur á Val, 119:81, á heimavelli, enda áttust þar við efsta og neðsta liðið. J'Nathan Bullock skoraði 19 stig fyrir Grindavík, Páll Axel Vilbergsson 16 og Sigurður Þorsteinsson 15. Hjá Val var Snorri Þorvaldsson með 19 stig og Birgir Björn Pétursson 16.
Þá fara fram undanúrslitin í bikarkeppni kvenna. Njarðvík tekur á móti Haukum og Snæfell fær Stjörnuna í heimsókn.
Staðan í leikjunum er uppfærð reglulega:
Úrvalsdeild karla:
Grindavík - Valur 33:21 - 67:38 - 89:56 - 119:81. LEIK LOKIÐ
Keflavík - KR 17:22 - 31:37 - 66:54 - 95:83. LEIK LOKIÐ
ÍR - Tindastóll 28:27 - 42:46 - 65:72 - 92:96. LEIK LOKIÐ
Bikarkeppni kvenna:
Snæfell - Stjarnan 24:16 - 45:29 - 79:39 - 101:55. LEIK LOKIÐ
Njarðvík - Haukar 26:16 - 37:33 - 53:49 - 67:67 - framlenging - 75:73. LEIK LOKIÐ
Staðan í deildinni, eftir leiki kvöldsins:
1. Grindavík 30
2. Keflavík 22
3. KR 20
4. Stjarnan 20
5. Þór Þ. 20
6. Snæfell 18
7. Fjölnir 14
8. Tindastóll 14
9. Njarðvík 14
10. ÍR 12
11. Haukar 8
12. Valur 0
