Naumt tap gegn Walesbúum

Ragna Ingólfsdóttir vann bæði í einliðaleik og tvíliðaleik í dag. mbl.is

Kvennalandsliðið í badminton tapaði naumlega fyrir Wales, 2:3, í síðasta leik sínum í Evrópukeppninni sem nú stendur yfir í Hollandi.

Íslenska liðið tapaði þar með öllum sínum þremur leikjum í riðlinum og hefur lokið keppni. Frakkar unnu riðilinn, Belgía varð í öðru sæti og Wales í þriðja sæti og Frakkar fara þar með í undanúrslitin.

Ragna Ingólfsdóttir vann einliðaleik sinn gegn Sarah Thomas, 21:11 og 22:20.  Tinna Helgadóttir tapaði einliðaleik sínum gegn Carissa Turner eftir æsispennandi oddalotu, 12:21, 21:19 og 18:21.  Snjólaug Jóhannsdóttir spilaði einliðaleik gegn Vikki Jones og tapaði 14:21 og 14:21.  

Tinna og Ragna spiluðu tvíliðaleik við Sarah Thomas og Carissa Turner og unnu 23:21 og 21:14.  Rakel Jóhannesdóttir og Karitas Ósk Ólafsdóttir kepptu við Bethan Higginson og Vikki Jones í tvíliðaleik sem lauk með naumu tapi, 21:23 og 17:21, og þar með var sigurinn í höfn hjá Walesbúum. 

Karlalandsliðið leikur nú síðdegis lokaleik sinn á mótinu og mætir þar Lúxemborg.