Stemning í Njarðvík og Stykkishólmi
Frá viðureign Snæfells og Vals í vetur. Golli / Kjartan Þorbjörnsson
Bikarúrslit eru handan við hornið í körfuboltanum og þar verða fjögur landsbyggðarlið á ferðinni. Í kvennaflokki munu eigast við Njarðvík og Snæfell en hvorugt liðanna hefur unnið bikarinn.
Hildur Sigurðardóttir, leikstjórnandi Snæfells, er enginn nýgræðingur þegar kemur að bikarkeppninni og er á leið í bikarúrslit með þriðja félaginu.
„Ég er ekki viss hversu oft ég hef farið í úrslit en ég vann bikarinn þrisvar með KR að ég held. Ég fór einnig í bikarúrslit með Grindavík á sínum tíma en tapaði,“ sagði Hildur þegar Morgunblaðið heyrði í henni hljóðið í gær. „Þetta er skemmtilegur dagur og einn stærsti leikur tímabilsins ásamt stórum leikjum í úrslitakeppninni enda mikil stemning í kringum leikinn.“
Karlaliðið fer fyrir klappliðinu
Snæfell hefur aldrei fyrr komist í úrslit í kvennaflokki en karlalið félagins varð bikarmeistari fyrir tveimur árum.
„Undirbúningurinn er svolítið öðruvísi þegar um landsbyggðarlið er að ræða. Þegar ég spilaði í bænum var lítið mál að æfa í Höllinni en við þurfum að taka ákvörðun um hvort við förum í bæinn daginn fyrir leik eða ekki,“ sagði Hildur og á þar við að liðunum sem komast í úrslit býðst að taka eina æfingu í Laugardalshöllinni daginn fyrir leik. „Prófa parketið og svona,“ bætti hún við og á von á góðum stuðningi frá Hólmurum.
„Ég reikna alveg með því að Hólmarar verði duglegir við að styðja við bakið á okkur eins og þeir hafa verið. Þeir hafa líka verið duglegir að styðja karlaliðið í gegnum árin og vonandi koma þeir einnig til að hvetja okkur. Mér heyrist að leikmenn karlaliðsins muni verða öflugir á pöllunum þannig að stemningin í félaginu er fín,“ sagði Hildur ennfremur.
Sjá meira í Morgunblaðinu í dag.
