Helgi Már stigahæstur í sigri Stockholms

Helgi Már Magnússon lék vel í sigri 08 Stockholm í kvöld. Kristinn Ingvarsson

Helgi Már Magnússon fór á kostum þegar lið hans 08 Stockholm vann Örebro 91:80 á útivelli í sænsku úrvalsdeildinni í körfuknattleik í kvöld. Helgi skoraði 27 stig, tók auk þess 6 fráköst og gaf tvær stoðsendingar. Helgi Már var með nokkrum yfirburðum stigahæsti leikmaður liðsins en næsti maður skoraði aðeins 19 stig.

Öll Íslendingaliðin spiluðu í kvöld en Jämtland, lið Brynjars Þórs Björnssonar, tók á móti Sundsvall með þá Jakob Örn Sigurðarson, Hlyn Bæringsson og Pavel Ermolinskij, sem reyndar er meiddur, innanborðs. Bæði Jakob og Hlynur léku mjög vel en Sundsvall hafði betur 85:82 eftir æsispennandi lokasekúndur þar sem staðan var jöfn um tíma 80:80.

Jakob skoraði 24 stig, tók 5 fráköst og gaf 3 stoðsendingar en Hlynur lét mun meira að sér kveða í fráköstunum og tók þrettán. Hann gaf lítið eftir í stigaskorun en 14 stig hans hjálpuðu mjög leikmönnum Sundsvall sem er stjórnað af Peter Öqvist landsliðsþjálfara Íslands.

Brynjar Þór átti ekki góðan leik í kvöld og skoraði aðeins 9 stig og þar á meðal tvö síðustu stig leiksins.

Þá skoraði Logi Gunnarsson 14 stig og tók 2 fráköst þegar lið hans Solna tapaði á heimavelli fyrir Norrköping 94:81.