Ísfirðingar aftur í úrvalsdeildina

Karla- og kvennalið KFÍ. Karlaliðið er búið að vinna 1. deildina og leikur í úrvalsdeild næsta vetur. www.kfi.is

KFÍ frá Ísafirði er búið að vinna sér sæti í úrvalsdeild karla í körfuknattleik eftir eins árs fjarveru. Ísfirðingar þurftu þó ekki að spila til þess að fá sætið endanlega í sínar hendur. Skallagrímur, eina liðið sem gat velt þeim úr efsta sætinu, tapaði fyrir Hetti á heimavelli sínum í Borgarnesi, 88:96, og þar með eru úrslitin í deildinni endanlega ráðin.

KFÍ, undir stjórn Péturs Más Sigurðssonar, hefur unnið 15 af 16 leikjum sínum í deildinni. Fjögur næstu lið fara í umspil um eitt úrvalsdeildarsæti. Skallagrímur og Höttur eru örugg þangað og hin tvö verða líklega Hamar og Breiðablik.

vs@mbl.is