Spænska liðið Unicaja Malaga sigraði þýska liðið ALBA Berlin í Meistaradeildinni í körfuknattleik í kvöld á Spáni 87:84 eftir framlengdan leik.
Leikurinn var gríðarlega jafn og aldrei munaði nema örfáum stigum á liðunum. Þau skiptust á að vera með forystuna en Þjóðverjarnir voru ívið oftar yfir.
Jón Arnór Stefánsson lék í 14 mínútur hjá Unicaja og skoraði 4 stig og gaf eina stoðsendingu. Hann skoraði úr báðum skotum sínum innan teigs en bæði þriggja stiga skot hans geiguðu.
Tímabilið byrjar vel hjá Jóni á nýjum stað því Unicaja hefur unnið báða leiki sína í Meistaradeildinni og alla þrjá í spænsku deildinni.