Kevin Durant og Russell Westbrook, lykilmenn Oklahoma City Thunder, í NBA-deildinni eru báðir byrjaðir að æfa með liðinu á nýjan leik en þeir hafa báðir verið frá vegna meiðsla.
Scott Brooks, þjálfari liðsins, tjáði blaðamönnum að Westbrook gæti jafnvel verið með á föstudaginn en ástand hans verður skoðað betur á morgun. Westbrook er að jafna sig af handleggsbroti og hefur misst af þrettán leikjum.
Durant brotnaði á hægri fæti og gæti einnig orðið leikfær fljótlega ef vel gengur. Brooks ítrekaði þó að þeim yrði ekki teflt fram fyrr en þeir yrðu orðnir 100% heilir heilsu.
Oklahoma hefur verið eitt sterkasta lið deildarinnar síðustu árin en er nú á botni Vesturdeildarinnar vegna meiðsla þessara tveggja stjörnuleikmanna með aðeins þrjá sigra í fimmtán leikjum.