Titilhungraðir íþróttaunnendur Clevelandborgar, sem undirritaður þekkir persónulega vel, geta nú loks fagnað titli eftir að LeBron James leiddi Cleveland Cavaliers á toppinn eftir sigur liðsins á Golden State Warriors í lokaúrslitaleik NBA deildarinnar á sunnudag, 93:89.
Cleveland vann þar með einvígi liðanna 4:3 og þar með var 52 ára bið eftir titli í einum af þremur vinsælustu liðsíþróttunum á enda fyrir langþjáða boltaeðjóta borgarinnar.
Leiksería þessara liða þróaðist ankannalega þar sem allir fyrstu sex leikirnir voru ójafnir, þótt bæði lið hefðu skorað jafnmörg stig í þeim leikjum. Meistararnir virtust hafa þetta allt í hendi sér þegar þeir náðu 3:1 forystu, með heimaleik til að klára dæmið í fimmta leiknum. Það var þá sem aganefnd deildarinnar ákvað að setja Draymond Green, framherja og harðjaxl Warriors, í leikbann vegna endurtekinna ásetningsbrota. Þetta riðlaði leik Golden State í leikjunum tveimur fyrir lokaleikinn og aðalspurningin var hvort liðið myndi ná sér í gang aftur.
Frá bæjardyrum Cleveland séð gekk allt út á frábæran leik LeBron James – í lokaúrslitunum sjötta árið í röð – og hvort Golden State gæti stöðvað hann í lokaleiknum. Augljóst var að ef einn eða tveir samherjar hans næðu sér á strik með honum, væri liðið til alls líklegt.
Grein Gunnars í heild sinni er í íþróttablaði Morgunblaðsins í dag.