Bandaríski körfuknattleiksmaðurinn Derrick Rose er sagður vera á leið frá New York Knicks til Cleveland Cavaliers í NBA-deildinni í körfuknattleik. Rose, sem er samningslaus, mun gera eins árs samning sem er metinn á 2,1 milljón dollara en sú upphæð jafngildir rúmum 220 milljónum íslenskra króna.
Rose, sem er 28 ára gamall, er yngsti leikmaðurinn í sögu NBA til þess að vera útnefndur mikilvægasti leikmaður deildarinnar en hann afrekaði það árið 2011.
Cleveland ætlar sér að endurheimta NBA-meistaratitilinn en það tapaði úrslitarimmunni fyrir Golden State Warriors í vor.
Rose skoraði að meðaltali 18 stig í leik á síðustu leiktíð, tók 3,8 fráköst og gaf 4,4 stoðsendingar. Hann kom til New York fyrir síðasta tímabil frá Chicago, sem hann lék með frá árinu 2008.