Íslenska kvennalandsliðið í körfuknattleik mætir Slóvökum í öðrum leik sínum í undankeppni EM í Slóvakíu í dag en íslenska liðið tapaði fyrir Svartfellingum í Laugardalshöllinni um síðustu helgi.
Ívar Ásgrímsson, þjálfari liðsins, hefur gert tvær breytingar á hópnum frá leiknum við Svartfjallaland. Emelía Ósk Gunnarsdóttir, Keflavík, kemur inn í liðið í stað Ragnheiðar Benónísdóttur. Þá kemur Elín Sóley Hrafnkelsdóttir, Val, inn fyrir Rögnu Margréti Brynjarsdóttur, sem kemst ekki með liðinu vegna anna í námi.