Margrét Lára með 100. markið

Mergrét Lára Viðarsdóttir, leikmaður Vals í knattspyrnu, hefur verið iðin við kolann í sumar og hafði gert 22 mörk í níu leikjum í Landsbankadeildinni fyrir leikina í gærkvöldi. Valur lagði Fylki 14:0 í gær og gerði Margrét Lára helming marka Vals, sjö talsins og hefur því gert 29 mörk í 10 leikjum.

Fyrir keppnistímbilið hafði hún gert 71 mark í deildarleik og því var sjöunda mark hennar í gær 100. markið sem hún gerir í deildinni. Þessum árangri hefur hún náð í 64 leikjum. Hún lék 40 leiki með ÍBV áður en hún gekk til liðs við Val og gerði 48 mörk í þeim. Á fyrsta tímabili sínu með Val, í fyrra, lék hún 14 leiki og gerði 23 mörk. Vart þarf að taka fram að hún er markahæst í deildinni í ár með 29 mörk en næst kemur Nína Ósk Kristinsdóttir úr Keflavík með 18 og Hólmfríður Magnúsdóttir úr KR hefur gert 16 mörk.