Margrét jafnaði 25 ára met Ástu

Margrét Lára Viðarsdóttir, knattspyrnukona úr Val, jafnaði á dögunum markamet Ástu B. Gunnlaugsdóttur í efstu deild kvenna. Margrét Lára skoraði þrennu í sigri Vals á KR, 5:2, síðasta föstudagskvöld og hefur nú gert 32 mörk í 12 leikjum í deildinni. Ásta skoraði 32 mörk fyrir Breiðablik sumarið 1981 og engin hefur verið nálægt því að ógna meti hennar í aldarfjórðung.

Margrét Lára, sem hefur skorað í öllum deildarleikjum Vals í sumar nema einum, hefur tvo leiki til að slá metið. Valskonur eiga eftir að mæta Keflavík og FH í tveimur síðustu umferðunum en þær þurfa að fá fjögur stig í þessum leikjum til að gulltryggja sér Íslandsmeistaratitilinn. Þær ruddu þó stærstu hindruninni úr vegi með sigrinum á KR og í raun ættu þær aðeins að þurfa þrjú stig enn þar sem markatala Vals er svo miklu betri en hjá Breiðabliki.