Breiðablik og Stjarnan skildu jöfn

Þrír leikir fóru fram í Landsbankadeild kvenna í knattspyrnu í kvöld. Breiðablik og Stjarnan skildu jöfn á Kópavogsvelli, 1:1. Harpa Þorsteinsdóttir kom Stjörnunni yfir á 15. mínútu með marki úr vítaspyrnu en Greta Mjöll Samúelsdóttir jafnaði fyrir Breiðablik á 27. mínútu. Breiðablik fékk einnig vítaspyrnu í fyrri hálfleik en Gretu tókst ekki að skora. Fylkir tapaði 2:4 á heimavelli gegn KR og Keflavík vann stórsigur gegn ÍR, 7:0. Mörk Keflavíkur skoruðu: Guðný Þórðardóttir 9., 33., 43., Danka Podovac 20. og Vesna Smiljkovic 73., 79., 87.

Hrefna Huld Jóhannesdóttir skoraði þrennu í 4:2-sigri KR en öll mörk leiksins voru skoruð fyrri hálfleik. Hrefna skoraði á 18., 41. og 45. mínútu. Edda Garðarsdóttir skoraði fyrir KR á 27. mínútu. Anna Björg Björnsdóttir skoraði bæði mörk Fylkis. Það fyrra úr vítaspyrnu á 21. mínútu eftir að Alicia Maxine Wilson varði boltann á marklínu með hendinni og fékk Wilson rautt spjald í kjölfarið. Anna skoraði á ný á 28. mínútu.