Skólinn er allur undirlagður

Strax í september-október höldum við úrtak fyrir þennan aldurshóp og þeir sem standa sig best eru valdir í æfingaliðið. Í vetur höfum við verið með 15 manna hóp sem æft hefur reglulega fyrir skólahreysti og af þeim munum við velja fjóra til að vera fulltrúar skólans,“ segir Ragnar Geir Hilmarsson stærðfræðikennari sem ásamt Jóhönnu Jónsdóttur íþróttakennara sér um Skólahreystilið Árbæjarskóla.

Margir vilja taka þátt

Það má heyra á Ragnari að mikil stemmning skapast í skólanum í kringum keppnina. „Sem dæmi mættu um 50 manns í úrtak hjá okkur. Það eru rúmlega 350 nemendur við unglingadeildina svo þetta reyndist vera um það bil 1/7 nemenda sem kom til að spreyta sig,“ segir hann. Oftar en ekki koma nemendurnir líka skemmtilega á óvart: „Í fyrra kom til dæmis fram nemandi sem við vissum ekki að væri mikið í íþróttum. Hann hafði verið í klifri en var hættur en mætti reglulega í ræktina. Hann fékk rosalegan áhuga á þessari keppni og setti stefnuna á að komast í liðið og æfði sig aukalega. Hann endaði síðan á að ná besta tímanum á hraðabrautinni þegar forkeppnin fór fram í Reykjavík. Hann var ótrúlega snöggur og vakti mikla athygli með frammistöðu sinni.“

Öflugt stuðningslið

Áhuginn á Skólahreysti er verulegur og magnast mjög í aðdraganda keppninnar. „Við auglýsum á upplýsingaskjám í skólanum og nemendur sjálfir ganga í stofur og auglýsa keppnina. Árangurinn lét ekki á sér standa í fyrra og yfir 100 nemendur mættu í appelsínugulum einkennislit skólans til að styðja liðið sitt.“

Ragnar segir nemendaráð skólans öflugt og það hafi í fyrra tekið upp hjá sjálfu sér að halda utan um stuðningsmannahópinn. „Mjög virkir krakkar eru í nemendaráðinu í vetur og munu örugglega gera það sama núna,“ segir hann, en Árbæjarskóli fær að sýna sig og sanna í undankeppni í Reykjavík í þessari viku. „Við tökum þessa viku með trompi með æsispennandi keppni, sterkum keppendum og kröftugu stuðningsliði sem lætur í sér heyra, og strax í kjölfarið tekur við árshátíðarvikan.“

Duglegir námsmenn

Að sögn Ragnars leikur enginn vafi á uppeldis- og forvarnagildi íþrótta barna. „Oftar en ekki eru krakkarnir sem leggja sig fram í íþróttum einnig að leggja sig fram í náminu. Þetta er duglegt fólk sem hefur lært að nota tímann vel. Þetta á í raun við um öll börn sem stunda einhverjar tómstundir, hvort sem það er í íþróttum, tónlistarnámi eða öðru,“ segir hann. „Þegar upp er staðið hefur það mikið að segja að frítíma þessara barna er varið með skipulögðum hætti í uppbyggilega og jákvæða iðju.“

Ætla að gera sitt besta

En hvernig líst Ragnari svo á lið Árbæjarskóla í Skólahreysti í ár? „Það er erfitt að segja til um hvernig við stöndum samanborið við aðra skóla, en ég veit að við erum með hörkuduglega krakka sem munu leggja sig alla fram, fram á síðustu stundu,“ segir hann. „Við vitum líka að hinir skólarnir munu án efa tefla fram mjög sterkum liðum, og það verður bara skemmtilegt að takast á við þau í keppni. Vitaskuld stefnum við alltaf á sigur, en mestu skiptir auðvitað að vera með og gera sitt besta.“

ai@mbl.is

Skólahreysti verður valáfangi

Unglingahópurinn sem þjálfar sig fyrir Skólahreysti hittist að jafnaði einu sinni í viku í allan vetur og æfir sig fyrir keppnina en öll stunda þau þessa þjálfun til viðbótar við aðrar íþróttir. „Skólinn á útbúnað til að æfa Skólahreystiþrautir eins og dýfur og lyftur og við útbúum einnig sérstakar æfingar fyrir hraðabrautina,“ segir Ragnar. „Við höfum kíkt til snillinganna í Sporthúsinu í Kópavogi þrisvar í vetur en þeir eru með ágæta braut. Vorum meira þar í fyrra en kreppuástandið kom í veg fyrir fleiri æfingar þar í ár.“

Þetta hafa nemendur og kennarar lagt á sig til viðbótar við skipulagt skólastarf fram til þessa. „En á næsta ári munum við stíga það skref að gera Skólahreysti að valgrein innan skólans fyrir unglingadeildina. Nemendurnir geta þá valið sér Skólahreysti sem fag og verður eðlilegur liður skipulagður inn í skóladaginn þeirra.“

Krakkarnir vilja útrás

Ragnar bendir á að börn og unglinga langi flest að hreyfa sig og séu ekki lengi að bregðast við þegar þeim er boðin skemmtileg hreyfing við sitt hæfi. „Þetta mátti til dæmis vel sjá þegar sparkvöllur var byggður á skólalóðinni en þar var malbikaður völlur fyrir. Ekki er nóg með að völlurinn sé vel nýttur af öllum árgöngum yfir skóladaginn heldur koma krakkarnir líka eftir að skóladeginum lýkur og halda áfram að spila fótbolta og allt án þess að fullorðnir þurfi að koma nálægt því eða skipuleggja nokkurn hlut,“ segir hann. „Þannig að með bættri aðstöðu hefur notkun vallarins stóraukist og aukið hreyfingu barnanna til muna.“