Lið Egilsstaðaskóla æfir á morgnana fyrir skólatíma

„Það gengur bara mjög vel. Eftir riðlakeppnina hafa krakkarnir verið að undirbúa sig á fullu og af mikilli alvöru fyrir úrslitakeppnina,“ segir Lovísa Hreinsdóttir íþróttakennari við Egilsstaðaskóla. Lið skólans keppir í ár til úrslita í Skólahreysti í fyrsta sinn.

„Þau æfa sig sérstaklega undir keppnina tvisvar til þrisvar í viku. Mæta í íþróttasalinn klukkan hálfátta á morgnana fyrir skóla og byggja sig upp. Það er mikil ákveðni í þessu hjá þeim og dugnaður. Takmarkið er að standa sig vel en fara í úrslitin með gleðina í fyrirrúmi,“ segir Lovísa.

Hún hefur séð um undirbúning ásamt samkennara sínum, Guðjóni Hilmarssyni. „Við höfðum forkeppni innan skólans í nóvember. Þeir sem völdust sem keppendur og varamenn hófu síðan markvissan undirbúning undir keppnina í byrjun janúar. Varamennirnir taka fullan þátt í þjálfuninni og eru tilbúnir að hlaupa í skarðið ef eitthvað bjátar á,“ segir Lovísa.

Styrkur liðsins í hversu jafnt það er

Hún segir styrk liðs Egilsstaðaskóla liggja í því hversu jafnir krakkarnir séu á hreystiþrautirnar. „Það er líka skýringin á því að við komumst áfram úr riðlinum en undanfarin ár höfum við verið í miðjum hópi í okkar riðli.“

Liðið vann Austurlandsriðilinn með 59 stigum og í öðru sæti varð Vopnafjarðarskóli með 49 stig. Keppni um þriðja sætið var jöfn en að lokum kom það í hlut grunnskólans í Breiðdalshreppi sem hlaut 44,5 stig, eða tveimur stigum meira en hvor um sig, grunnskóli Fáskrúðsfjarðar og grunnskóli Hornafjarðar.

Setur skemmtilegan svip á skólastarfið

Liðsmenn kappliðs Egilsstaðaskóla iðka allir aðrar íþróttir jöfnum höndum, koma úr fimleikum, fótbolta, körfuknattleik og skíðum. „Þetta er jafn hópur og við erum ekki með nein leynivopn,“ segir Lovísa.

Lovísa segir að þátttaka í Skólahreysti sé mjög jákvætt fyrir bæði liðið og skólann. Keppnin setji skemmtilegan svip á skólastarfið. „Okkar lið fer í úrslitin í Laugardalshöll með góðu og jákvæðu hugarfari. Þetta er mjög jákvætt fyrir krakkana og við vonum að allir hafi gaman að og mönnum gangi vel,“ segir Lovísa Hreinsdóttir við fréttavef Morgunblaðsins.